कुलमान हटे पनि उद्योगी–प्राधिकरण टकराव कायमै

काठमाडौँ । उद्योगी र नेपाल विद्युत् प्राधिकरणबीचको टकराव यथावत् नै रहेको पाइएको छ । प्राधिकरणका तत्कालीन कार्यकारी निर्देशक कुलमान घिसिङ र उद्योगीबीचको टसलका कारण कुलमानले पदबाटै हात धुनुपरेको थियो ।

तर, कुलमान पदबाट हटेपछि पनि उद्योगी–प्राधिकरण टसल बाँकी नै छ । सरकारले गत ११ चैतमा कुलमान घिसिङलाई बर्खास्त गरेको थियो ।

उनलाई प्राधिरणबाट हटाएसँगै भारतसँग विद्युत् आयात अवधि थप ६ घन्टा बढाउने सहमति भएको थियो ।

उक्त सहमतिसँगै पिक आवरबाहेक अन्य अवस्थामा औद्योगिक क्षेत्रमा पनि बिजुली कटौती नभएको र अब सबै प्रकारका ग्राहककहाँ चौबिसै घन्टा नयाँ कार्यकारी निर्देशक हितेन्द्रदेव शाक्यले समेत बताउँदै आएका थिए ।

यसअघि ६ घन्टादेखि १२ घन्टासम्म लोडसेडिङ हुँदै आएकामा अब पूर्ण रूपमा औद्योगिक लोडसेडिङ हटाइएको शाक्यको दाबी छ ।

तर, शाक्यले भनेअनुरुप लोडसेडिङको समस्या समाधान नभएको उद्योगीहरू बताउँछन् । विद्युत् आपूर्तिको सवालमा उद्योगी र प्राधिकरणबीच नै कुरा बाझिएको छ ।

भारतबाट आयात बढाए पनि औद्योगिक क्षेत्रमा लाइन काटिन भने नरोकिएको उद्योगीहरू बताउँछन् ।

भारतबाट पहिलाको भन्दा ५ घन्टा बढी बिजुली आयात भए पनि औद्योगिक क्षेत्रमा बिजुली कटौती भइरहेको वीरगन्ज उद्योग वाणिज्य महासंघका उपाध्यक्ष अनिल अग्रवाल बताउँछन् ।

पहिलाको भन्दा ३–४ घन्टा मात्रै कम लोडसेडिङ भइरहेको बताउँदै उनले भने, ‘अहिले औद्योगिक क्षेत्रमा लाइन काटिएको छैन भन्ने विषयमा कुनै सत्यता छैन । विद्युत् कटौती भइरहेको छ । अब यो प्रणाली सुधारिन्छ कि १’

यता, प्राधिकरण भने पिक आवरबाहेक अन्य समयमा विद्युत् कटौती नभएको बताउँछ । प्राधिकरणका सूचना अधिकारी भाइराजा शिल्पकारले सरकारले भारतसँग विद्युुत् निर्यात बढाउन आग्रह गरेसँगै आउने बिजुली बढेकाले लाइन काट्नुपर्ने अवस्था नआएको बताए ।

उनी पिक आवरबाहेक अन्य समयमा लाइन कटौती नभएको बताउँछन् । ६ घन्टादेखि १२ घन्टासम्म लोडसेडिङ हुँदै आएकामा अहिले ३ देखि ४ घन्टा मात्रै बिजुली कटौती भइरहेको उनले बताए ।

‘भारतले नेपाललाई हाल उपलब्ध गराउँदै आएको विद्युत् आयात अवधि थप ५ घन्टा बढाउन सहमत भएको छ,’ उनले भने, ‘यसै अनुरुप हामीले उद्योगहरूमा लाइन दिएका छौँ ।’

विद्युत् आपूर्ति सहज बनाउन औद्योगिक क्षेत्रका ग्राहकलाई बेलुका ५ बजेदेखि राति साढे ११ बजेसम्म (पिक आवर) मा भने लाइट लोडमा उद्योग चलाउन अनुरोध गरिएको कार्यकारी निर्देशक शाक्यले बताए ।

रातको समयमा ६०० मेगावाट विद्युत् आयात गर्न पाउँदा अर्धजलाशययुक्त आयोजनाहरूको जलाशय भरिएर पिकआवरमा चलाउने गरी लोड व्यवस्थापन गरिएकाले औद्योगिक क्षेत्रमा लाइन दिन सम्भव भएको उनले बताए ।

‘रातको समयमा ६०० मेगावाट विद्युत् आयात गर्न पाउँदा अर्धजलाशययुक्त आयोजना पिकआवरमा चलाउने गरी लोड व्यवस्थापन भएको छ,’ उनले भने, ‘जसले गर्दा हामीले उद्योगहरूको लाइन काटेका छैनौँ ।’

यता, यसअघि ३ अक्टोबरमा भारतसँग भएको सम्झौताअनुसार २३० मेगावाट विद्युत् निरन्तर दिने विषयमा पनि भारतको एनभिभिएन लिमिटेडले सकारात्मक प्रतिक्रिया दिएको उनकोे भनाइ छ ।

१ अप्रिलदेखि राति ११ देखि बिहान ४ बजेसम्म ६०० मेगावाट विद्युत् आयात हुने भएको छ । भारतले १५ मार्चदेखि ‘सन आवर’ अर्थात् बिहान ६ बजेदेखि अपराह्न ५ बजेसम्म मात्रै बिजुली दिन थालेपछि प्राधिकरणले दैनिक १२ घन्टासम्म लोडसेडिङ गर्दै आएको थियो । नेपालले अहिले दैनिक ११ हजार ५६८ मेगावाट बिजुली आयात गर्दै आएको छ । नोटबजारबाट साभार गरिएको